Thursday, May 15, 2008

-2- المتصفح الرائد


بسم الله الرحمن الرحيم


في الموضوع السابق عن المتصفح الرائد شرحت خاصية حفظ كافة الإعدادات الخاصة بالمتصفح وحفظ صفحاتك المفضلة في مخزن أفانت
بحيث تقدر توصلها وانت في أي مكان سواء قاعد على جهازك او عند حد من زمايلك او قرايبك أو وانت في شغلك .. طالما فيه نت وتقدر تسطب برنامج المتصفح الرائد على الجهاز اللي قاعد عليه

ومن ضمن الحاجات اللي تقدر تحفظها في مخزن أفانت
هي نماذج التعبئة الآلية


وهي ميزة رائعة وجميلة جدا يوفرها المتصفح الرائد
تسهل لك عملية تسجيل دخولك في كافة المواقع اللي انت عضو فيها
زي المنتديات مثلا أو بلوجر أو فيس بوك أو حتى الإيميل .... إلخ

هتفيدك أوي الخاصية دي لو انت عندك مواقع كتير مسجل فيها
وبدل ما تتعرض لنسيان معلومات تسجيل الدخول في هذه المواقع
هتحفظها وتخزنها في المتصفح الرائد بحيث بعد كده
بمجرد ضغطة ماوس واحدة تقدر تعمل تسجيل دخول لموقعك

وهذه البيانات كلها محمية بكلمة سر واحدة انت اللي بتنشئها .. بكل سهولة
وملهاش حد أدنى في طولها .. يعني تقدر تخليها من حرف أو رقم واحد .. أو أكثر

وإليكم الشرح


أولا هتفتح صفحة تسجيل الدخول الخاصة بالموقع اللي انت عايز تحفظ معلومات تسجيل دخولك فيه
وليكن مثلا بلوجر أو حسابك في جوجل عموما

واللي هي الصفحة دي


وبعد ما تكتب الإسم أو الايميل وكلمة السر
وقبل ما تضعط على دخول او تدوس انتر
تيجي على شريط أدوات المتصفح الرائد وتضغط على
تعبئة آلية ثم حفظ النماذج
هتظهر لك نافذة تعبئة آلية جديدة


إضغط على موافق


وأحيانا عند تسجيل دخولك لأي موقع تظهر لك تلقائيا رسالة في أعلى المتصفح


فقط إضغط على كلمة نعم لحفظ النماذج تلقائيا
يعني كده في طريقتين لحفظ نماذج وبيانات تسجيل الدخول

وبكده تكون حفظت في متصفحك معلومات تسجيل الدخول على حساب جوجل واللي بيتضمن حسابك في بلوجر

وللتأكد من حفظه .. إضغط على تعبئة آلية
وفي القائمة المنسدلة هتلاقي رابط تسجيل الدخول المباشر للموقع


وبأي من الطريقتين تقدر تحفظ تسجيل الدخول لأي موقع
-- -- --


إعداد كلمة سر لنماذج التعبئة الآلية المحفوظة في المتصفح


ودي خطوة مهمة جدا ولابد منها لحماية معلوماتك
وعلى فكرة كلمة السر دي بتكون بالإضافة لكلمة السر الخاصة بحسابك أصلا في مخزن أفانت
فاكرينها؟؟ .. اللي اتكلمت عنها في الموضوع السابق
.يعني كده البيانات دي تعتبر محمية مرتين

في شريط أدوات المتصفح إضغط على
تعبئة آليه ثم الحماية ثم كلمة المرور لحماية الإعداد
تظهرلك النافذة دي


ولو دي أول مرة تعمل كلمة سر للنماذج لا تكتب شيء في خانة كلمة المرور الحالية
وبكده عند الضغط على أي رابط من قائمة التعبئة الآلية لتسجيل دخولك لأي موقع انت حفظته .. هيطلب منك ادخال كلمة السر اللي انت لسة عاملها من شوية


-- -- --

لتحميل البرنامج إضغط هنا
-- --

أتمنى يكون الشرح مفيد
ومرحبا بأي استفسار
وادعولي عشان عندي امتحانات من يوم الحد الجاي ان شاء الله
:)



12 comments:

Salwa said...

جميل يا محمود

شغل جامد بجد

ركز في الإمتحانات بقى
ربنا ينجحك ويوفقك إن شاء الله

دمت بكل الخير

آلام وآمال said...

الف الف شكر يا سلوى
ربنا يجبر بخاطرك يارب
:D :D

الربان said...

تحياتي

اول مرة ادخل الي هذه المدونة الجميلة المفيدة...و ان شاء الله لن تكون الاخيرة.

أشكرك كل الشكر علي جهدك الطيب..ربنا يجعله في ميزان حسناتك..
محتاجين مثل هذه المدونات التي تعلمنا و تضيف الي معلوماتنا...بارك الله فيك.

تحياتي و تقديري

آلام وآمال said...

الربان
-------
جزاك الله خيرا

وانا اتمنى ان لاتكون الأخيرة
والف شكر على كلامك الطيب
ربنا يكرمك
ومرحب بيك ف أي وقت بأي استفسار
:)

باب النجار said...

عندى سؤال مهم بالنسبة لى
صديقة ليا عايزة تكتب عندى فى المدونة بإسمها
هل لازم يكون ليها مدونة ولا يكفى انه يكون ليها حساب على جوجل وخلاص
وايا كانت الاجابة ياريت تقوليلى على الخطوات اللى تخلى اكتر من شخص يكتب فى مدونة واحدة
ازاى اعمل اعضاء فريق للمدونة ؟؟
شكرا وجزاكى الله خيرا

Misrdream said...
This comment has been removed by the author.
Salwa said...

شكرا لزيارتك وتشريفك للمدونه
هذه المدونه مشتركه بيني وبين محمود أو آلام وآمال
وبعد إذن محمود هجاوب عليكي عزيزتي
تسمح لي يا محمود ؟؟

أوك
:)
هو مش لازم بكون عندها مدونه
فقط إعرفي إيميلها
و

الأمر بسيط
إنت بتدخلي مدونتك
وتختاري settings
ثم تختاري permissions
هيظهر لك مستطيل اضغطي Add authors
هيظهر لك مستطيل تاني مكتوب أعلاه
Invite more people to write to your blog
اكتبى إيميل من تريدين أن يشاركك في مدونتك
ثم اضغطي invite

وبس

دمتى بكل الخير
وأي استفسار
إن شاء الله محمود موجود أو أنا

mony said...

فعلا مدونة جميلة جدا

اكيد هستفيد منها جدا لان معلوماتي في الكمبيوتر علي قدي شوي



بس هزهقك من كتر الاسئلة

بس استحمليني

آلام وآمال said...

Misrdream
------------
جزاك الله خيرا على تشجيعك
اتمنى تنورنا دايما وتحت امرك في اي حاجة بإذن الله

آلام وآمال said...

mony
------
اتمنى فعلا انك تستفيدي ولو بحاجة بسيطة من خلال مدونتنا
ومرحب بيكي في أي وقت بأي استفسار
ومتخافيش ان شاء الله هنستحملك وهنكون سعداء كمان بتواجدك

سكــر said...

رائع

وشرح وافى


جزيت خيرا اخى

اخيك احمد

آلام وآمال said...

سكــر
-------
وجزاك الله خيرا يا سكر
الف شكر على تعليقك
:)