Friday, March 28, 2008

-1- المتصفح الرائد ومميزات عبقرية

بسم الله الرحمن الرحيم

Avant Browser


يعتبر أول متصفح استخدمته في حياتي النتية كلها
ولم أندم في يوم اني اتعرفت عليه بصراحة
متصفح عبقري بمعنى الكلمة

هحاول ان شاء الله انقل لكم بعض مميزات هذا المتصفح الرائد
وما اكتشفته فيه خلال الفترة اللي عرفته فيها
وطبعا مش هقدر اخلصها كلها ف بوست واحد
ربنا المستعان


أولا قم بتحميل البرنامج من هنا
وقم بتسطيبه على جهازك

:D وتعالوا أوريكم أنا ليه بحبه أوي كده
----------

:: مخزن أفانت
الميزة دي انا قصدت اني أبدأ بيها لأني شايفها من وجهة نظري
أهم واحلى ميزة في أفانت
فكم مرة فقدت صفحاتك المفضلة بعد تنزيل ويندوز جديد؟
طب عايز تفتح نت في أي مكان تروحو وتلاقي صفحاتك المفضلة وكل ما يتعلق بمحفوظاتك؟
طب عندك كذا شخص بيستخدم الجهاز ومش عايز حد يطلع على صفحاتك المفضلة؟
بخطوات بسيطة جدا تقوم بإنشاء حساب خاص بك بايميلك على أفانت

عند فتح المتصفح تظهر لك نافذة صغيرة اسفل يمين الصفحة
تسمى نافذة الجوار


بعد الضغط على ... دخول ستظهرلك النافذة التالية
إملئ البيانات المطلوبة


وتقدر تدخل بعد كده على حسابك بايميلك وكلمة السر
من خلال نفس نافذة الجوار


الآن قمت بعمل حساب خاص بك على مخزن أفانت
وفيه تستطيع تخزين كل مفضلاتك بحيث تكون محفوظة على سرفر خاص بأفانت
ومؤمَّنة بكلمة سر يعني محدش يقدر يطلع عليها غيرك انت
ولو الويندوز عندك وقع (لو حتى بعت الجهاز كله) صفحاتك المفضلة وجميع محفوظاتك بخير وسلام
وفي أي مكان تروحو مجرد ما تسطب افانت على الجهاز اللي
بتستخدمه (وطبعا تقدر تجيب البرنامج في دقيقة من موقعه وتسطبه بردو في اقل من دقيقة)ـ

وكمان في ملحوظة أحب اقولها (معلش صدعتكم انا اسف)ـ
تقدر تتحكم في ما اذا كنت عايز المتصفح يفتح على حسابك مباشرة
او يفتح ويستنى منك أمر الدخول على الحساب
وده من خلال نافذة الجوار بردو (أجارنا الله وإياكم من كل سوء)ـ
علم على هذا الاختيار


وبالطريقة دي لو فيه 100 شخص بيستخدمو الجهاز
إذا كل واحد منهم عمل حساب خاص بيه
يبقى كأن عند كل واحد منهم متصفح كامل خاص به بمحفوظاته واعداداته
في أحلى من كده؟؟

دلوقت بقى لو محتاج تخرج من حسابك او عايز تبدل من حسابك لحساب تاني
يا اما تقفل البراوسر كله وتفتحه من جديد وتسجل دخول بايميل الحساب التاني
او من خلال شريط الأدوات
تختار ملف .. ومنه كما في الصورة


------ ------


:: كيفية إضافة مفضلة جديدة

.. وانت فاتح الصفحة اللي عايز تحفظها عندك في المفضلة
من شريط الأدوات في أعلى المتصفح
أضغط على المفضلــة .. ومنها مفضلة جديدة
اضغط موافق في النافذة التي ستظهر أمامك


-------------

عشان مطولش عليكم أكتر من كده
دي تعتبر مقدمة لمميزات البرنامج
اللي عشان اخلصها كلها محتاجين ييجي خمس مواضيع او اكتر

المرة الجاية ان احياني الله
هتكلم عن ميزة التعبئة الآليه
وبعض من أسرار استخدامات الماوس مع المتصفح الرائد
حاجات كده ملهاش حل تخلي التصفح متعة

وعندي شبه يقين ان عشاق الفايرفوكس لو جربو الأفانت
يمكن يكون عندهم كلام تاني

:D ايه رأيكم بقى ينفع اشتغل مندوب دعاية؟

22 comments:

Ahmed Al-Sabbagh said...

رائع جدا

انت شجعتنى اوى انى اقوم بالمغامرة دى

ولو انى تقليدى والتغيير بالنسبة لى صعب

بس كلامك الجميل مشجع اوى

بجد المدونة دى عظيمة

تحياتى لكم

احمد الصباغ

NoR said...

أنا من مستخدمي البرنامج ده وجميل جدا ومريح في الشغل عليه

وأنا مكنتش أعرف ان ليك ميول كمبيوترية ودعاية كمان

مزيد من التميز لك يا محمود
دمت بخير وسلام دائما

Salwa said...

جميل البوست يا محمود

شجعتني إني أجربه

دمت بكل خير

آلام وآمال said...

Ahmed Al-Sabbagh
------------------
خالو احمد كلامك ده شهادة اعتز بيها
جزاك الله خيرا
ولو جربته فعلا ياريت تقولي رأيك فيه بجد
ويارب دايما منورنا كده



NoR
-----
يكفيني يا نور تشريفك بس لموضوعي
واديني بحاول على أد ما اقدر اني افيد غيري باللي اتعلمته
وان كنت مش محترف يعني
بس الحمد لله
وان شاء الله دايما كده تكوني متواجدة عندنا يانور



Salwa
--------
ياريت تجربي وتقولي على النتيجة فعلا يا سلوى
انا متأكد انه هيعجبك
وهتستريحي في استخدامه ان شاء الله
وجزاك الله خيرااا
وطبعا انتي عارفة على ايه

عاشقه الفردوس said...

تنفع؟


ده انت تنفع ونص

خليتني هسطبه دلوقتي حالا

جزاكم الله خيرا يامحمود والله

في ميزان حسناتك باذن الله

فى القلب said...

منتحرمش أبدااااااااً منك والله أستفت جدا جدا جدا جدا بالمدونه دى
جعله الله فى ميزان الحسنات
وشكراً على المجهود الرائع والعظيم

ولى طلب صغنونى وأرجوسرعه الأجابه

عايزه رابط لاعظم أنتى فيرس وسباى

ولكم منى جزيل الشكر

آلام وآمال said...

عاشقه الفردوس
--------------
اولا الف شكر ليكي يا عاشقة الفردوس انك كسرتي رقم اربعة اللي كان معقدني ههههههه
وثانيا شكرا بردو على تشجيعك وياريت لو احتجتي اي حاجة قوولي على طول
وتابعي معانا بقية شرح مميزات البرنامج ان شاء الله


فى القلب
--------
أهلا بيكي والله فرحت جداا بتعليقك وتشريفك موضوعي المتواضع
وطلبك جاااااهز في التو واللحظة

أقوى انيفيرس وانتي سباي وير عن تجربة بصراحة هو كاسبرسكاي
انا بسطبه على جهازي وانسى الفيروسات وما شابه

وده رابط التحميل

حضرتك كل اللي هتعمليه انك تسجلي ميلك في المساحة اللي ف منتصف الصفة تماما وهو هيبعت لك لينك التحميل على بريدك .. تحمليه وتسطبيه على جهازك
وانسي بعد كده حاجة اسمها فيروسات
بس طبعا لازم الأول بعد ما تسطبيه تعملي سكان للجهاز كله
ولو لقيتي مشاكل كتير على البارتشن اللي عليه نسخة الويندوز يبقى من الأفضل تنزيل ويندوز جديدة تجنبا لأي معوقات بعد كده ومن ثم تسطيب الانتيفيرس على نضاااافة ويفضل أن يكون اول برنامج تسطبيه بعد الويندوز الجديدة

الباحث عن الحقيقة said...

بصراحة اه تنفع مندوب دعاية واعلان
كلامك عن المتصفح جميل
وفعلا دى خاصية ممتازه
بس يا جميل وولو برضه
مش هسطب البرنامج غير لما تكملى باقى المميزات
قلت ايه
منتظرك بقى
يلا انا معنديش وقت
هات البوست اللى بعده

سكــر said...

مشكورين على البرنامج الرائع

ومشكورين على البلوج الاروع المفيد

تحياتى احمد سكر

آلام وآمال said...

الباحث عن الحقيقة
--------------
طب الحمد لله ان الشرح عجبك
دي شهادة أعتز بيها جداا
وان شاء الله قريب اوي انزل بقية البوست وانا اسف بجد على التأخير بس ظروف غصب عني والله
ومنرحمش من زياراتك اببداا


سكــر
-------
العفو يا سكر
والشكر لله
بس ياريت تقوللي رأيك في البرنامج لما تجربه ولو عندك اي استفسار قووول على طوووول
:)

Kazilar said...

Attention! See Please Here

TeKa said...

شكرا على المتصفح الرهيب بس مش هحمله للأسف الأن عشان الإمتحانات
تيكا

Dr-hema said...

شكرا يا باش مهندس سلوى على المتصفح

Dr-hema said...

شغال

Dr-hema said...

اسف جدااااااااااااااااااا مختش بالى من ان اللى كاتب الموضوع واحد بجد اعذرنى لانى متعود ان الاستاذة سلوى هى اللى بتكتب علطول
وشكرا بجد متصفح هايل جدااااااااا عشان خاصية التخزين دى
د/هيما

شيماء سوار said...

اكييييييييييييييد تنفع يا محمود


انا فعلا لما انت قلتلي عنه انا جربته

وحاليا ما بقعدش على كمبيوتر الا


بسطبه الاول وافتحه هو

وميزاته الحلوة اللي انت قلت عليها

فعلا بتخليه مميز


بالذات الخصوصية

شيماء سوار said...

يا ريت يا محمود تكمل عن التعبئة الالية

لاني مش فاهماها

وشكرا يعطيك العافية

آلام وآمال said...

TeKa
-------
العفو يا تيكا
وربنا يوفقك في امتحاناتك
شد حيلك يا بطل
:)


Dr-hema
-----------
ولا يهمك يا دكتور هيما والله انت منورنا
ومتحرمناش من زياراتك
:)


شيماء سوار
-------------
ايه ده
معقوله سوار بحالها بتعلق عندنا
يادي النور يادي الهنا ههههههه

كويس اوي يا شيماء ان المتصفح عاجبك كده واكيد انتي اكتشفتي فيه حاجات تانية بردو
وان شاء الله قريب اوي اوي انزل موضوع عن بقية المميزات اللي قلت عنها
واعذريني على انشغالي الفترة دي

نورتي عالم الكمبيوتر يا ميس شيمووو
:)

اسكندراني اوي said...

شكرا جزيلا
وليه اتبرع بالتعليق
دا اقل ما يقال عن بلوج جميله اوي كده

NOR said...

أنا جايه المرة دي وعندي مشكلة أنا لما كنت بنزل ويندوز جديد وأسطب البرنامج بلاقي كل المواقع اللي محفوظة في المفضلة موجودة من غير ما أعمل حساب عليه
المرة دي نزلت ويندوز وسطبت البرنامج وملقتش المواقع :( أمل ايه بقا في المشكلة دي
يارب يكون ليها حل ولو مش ليها يبقى
كويس انها جت على قد المواقع وبس :)

دمت بخير وسلام يا محمود

آلام وآمال said...

اسكندراني اوي
----------------
ربنا يكرمك يا ايهاب
الف شكر ليك يا حبي
:)

آلام وآمال said...

NOR
-----
بصي يا نور هو في حالة واحدة بس ممكن تلاقي محفوظاتك اللي ف المفضلة موجودة زي ماهي بعد تسطيب الويندوز من جديد
وهي انك تكوني سطبتي الويندوز من غير فورمات للسي
أو مثلا عملتي ريفرش للنسخة
او حالة كمان لو انتي مسطبة برنامج الأفانت على بارتشن تاني غير السي

غير كده بصراحة مش عارف ازاي لقيتي المفضلة زي ماهي بعد تنزيل ويندوز جديد

لكن معلش انها جت على اد المواقع زي ما قلتي
لأن طالما عملتي فورمات للسي يبقى أكيد راحت كل الملفات المؤقتة اللي كانت متخزنة عليه واللي من ضمنها مواقع المفضلة

وبعد كده بقى ياريت تعملي حساب على مخزن أفانت
:)
ولو احتجتي اي حاجة احنا تحت أمرك