Monday, March 10, 2008

برامج التحميل من الإنترنت


بسم الله الرحمن الرحيم

بداية انا مبسوط جدا لاشتراكي في المدونة
وده أول موضوع ليا فيها
وبشكر جدااا المدونة العزيزة سلوى انها اتاحت لي الفرصة دي
ربنا يجعلها في ميزان حسناتنا وينفعنا بيها
ويارب كلنا نستفيد منها ان شاء الله
-- -- --

برامج التحميل من الانترنت
بناء على طلب الاستاذ سووو

اولا .. ايه فايدة البرامج دي؟
لو انت معندكش برنامج تحميل على جهازك وبتستعمل أداة التحميل الافتراضية اللي بيوفرها نظام التشغيل ـ الويندوز ـ قد تواجهك بعض المشاكل
ومن اخطر وارخم المشاكل دي هو ما يلي

لو اثناء عملية التحميل وقبل اكمالها حصل اغلاق للجهاز بأي شكل من الاشكال بقصد او بغير قصد فلابد وللأسف انك ستفقد الاتصال بسرفر التحميل .. وياسلام بقى لو كنت بتحمل ملف كبير وبقالك ساعة مثلا ولا حاجة .. يعني راااحت فلوسك يا صااابر

وكمان احيانا بتكون بعض السرفرات تعبانة او فيها مشاكل او عليها ضغط مثلا .. وبالتالي تكون معرضة للتوقف المفاجئ اثناء عملية التحميل .. يعني نفس القصة .. وفلوسك راحت بردو يا عم صابر

برامج التحميل تريحك نهائيا من المشكلة دي
لأن من ضمن مميزاتها انك مش بتكون مقيد بوقت محدد عشان تحمل ملفاتك .. ونوضح النقطة دي كمان شوية
-- -- --

برامج التحميل كتير .. وانا اكتفيت باتنين منهم بس والاتنين مشهورين جداا وشغلهم سهل اوي
--
برنامج سهل جداا في استعماله
مفيهوش تعقيدات كتير
وخفيف جدا على جهازك
انا شخصيا بستعمله بصراحة

اضغط هنا لتحميل البرنامج
وبعد تحميل البرنامج وتسطيبه على الجهاز سهل جدا

دي واجهته الرئيسية

اضغط على الصور لتراها بحجمها الطبيعي

لبدء تحميل الملفات بالبرنامج يوجد اكثر من طريقة
اما بالضغط مباشرة على رابط التحميل
copy shortcut او نسخ الرابط من خلال كليك يمين ـ
وفي الحالتين ستظهر تلقائيا هذه النافذة
ولابد أن يكون البرنامج في وضع التشغيل


لو حبيت توقف التحميل في اي وقت لأي سبب
فقط اضغط على علامة التوقف المؤقت


واذا حبيت تكمل التحميل مرة تانية
فقط افتح البرنامج واضغط على ستارت


ولو حصل اي مشكلة والجهاز فصل منك مثلا او سرفر التحميل اتعطل
بعد تشغيل البرنامج مرة تانية ستجد رابط التحميل موجود كما هو
فقط اضغط ايضا على ستارت ليكمل التحميل على ما هو عليه
.. ..

الاصدار الاخير من البرنامج يعرض شريط جانبي به بعض الاعلانات لبرامج واشياء اخري
من الافضل ازالة هذا الشريط لتخفيف تشغيل البرنامج .. من خلال

ستظهر لك الرسالة التالية


....

البرنامج يدعم اللغة العربية
View من نافذة البرنامج الرئيسية اضغط
.. واختر


بعدها ستظهر لك نافذة اخري بها قائمة تحوي العديد من اللغات واول لغة فيهم العربية .. اخترها واضغط على ابديت .. وأعد تشغيل البرنامج

وأرجوكم اللي عنده اي استفسار يقول في التعليقات
-- -- --

البرنامج التاني
internet download manager
يعتبر من اشهر برامج التحميل وأقواهم
ويوفر اللغة العربية

اضغط هنا لتحميل البرنامج
والنسخة دي هتشتغل معاك فقط لمدة شهر كامل
وبعد تحميل البرنامج وتسطبيه .. سيطلب منك اعادة تشغيل الجهاز

دي الواجهة الرئيسية


:D أول حاجة هنعملها نغير لغة العرض للغتنا الجميلة
view من شريط الأدوات اضغط على
languge ومنها
Arabic واختر


وبعدها نستطيع بسهولة ان نتعامل مع البرنامج ونكتشف مميزاته
وطريقة التحميل به لا تختلف كثيرا عن السابق
وبردو المجال مفتوح في التعليقات لأي استفسار في البرنامج
.. ..

يوفر هذا البرنامج ميزة جميلة جدا
YouTube وهي امكانية التحميل من
فقط قف في اي مكان في صفحة اليوتيوب ـ ما عدا نافذة عرض الفيديو ـ
واضغط كليك يمين واختار



-- -- --

اعذروني على الاطالة
ومستني تعليقاتكم
:)) ولو في اي استفسار المحل مفتوح اربعة وعشرين ساعة
بس متنسوناش من دعائكم الله يكرمكم

28 comments:

بنات افكارى said...

السلام عليكم

اول تعليق عندكم واول زيارة
اولا جزاكم الله خيرا على الفكرة
وربنا ينفع بكم جميعا ان شاء الله

وبجد موضوع ممتاز انا استفدت منه
كتير وان شاء الله هاطبقة
ومفيش اطالة ولاحاجة طالما فى فايدة
وجميل التوضيح بالصور ربنا يكرمك يافندم ومنتظرين كل جديد
ان شاء الله وربنا يكرمكم جميعا

السلام عليكم

أنسانة-شوية وشوية said...

ياه عليك يا محمود شرحك رائع انا عارفة انى هزهقك بطلباتى دى بس مبدئيا للتعليق وبعدين الطلبات
جزاك الله خيرا

خمسة فضفضة said...

السلام عليكم ورحمة الله وبركاته

الف مبروك المدونه الجديده

ماشاءالله شرح جميل ومبسط ، جزاك الله خيرا يا محمود

معلش استفسار
بالنسبةللدونلوود مانيجر اما بعمل كليك يمين في صفحة اليوتيوب مش بلاقي وسط الخيارات تحميل محتوي الفيديو

ياتري الخيار ده في انهي نسخه
انا بستخدم ال 5.09 بيتا

شكرا ومعلش هاتقل عليك


تحياتي

رفقة عمر said...

ماشاء الله جزاك الله كل خير
انا هنزل فلاش جيت
علشان التحميل عندى دايما يضيع

آلام وآمال said...

بنات افكارى

وعليكم السلام ورحمة الله وبركاته
يارب دايما مشرفانا كده
والحمد لله ان الموضوع عجبك
ومستني تقولي رأيك في البرنامج اللي هتجربيه ان شاء الله



أنسانة-شوية وشوية

يا خبر ابيض
والله حضرتك كلك ذوق
والحمد لله ان الشرح طلع حلو ده انا كنت قلقان اوي عشان ده تقريبا اول موضوع ليا بالنظام ده
وانا عمري ما ازهق ابدا من طلبات حضرتك والله
بس يارب اكون عند حسن ظنك

آلام وآمال said...

خمسة فضفضة

وعليكم السلام يا دكتورة والله يبارك فيكِ
حضرتك لو فتحتي صفحة اليوتيوب في الانترنت اكسبلورر العادي هتلاقي الخاصية دي
وطالما مش ظاهرة عندك في قايمة الكليك اليمين يبئا اكيد حضرتك بتستعملي متصفح غير الاكسبلورر
وفي الحالة دي لازم تروحي لإعدادات المتصفح وفي التخصيص هتلاقي الخاصية دي تعلمي عليها ودوسي اوك

لو حضرتك معرفتيش تعملي الحكاية دي بس قوليلي متصفحك ايه وانا اشرحلك عليه بالتفصيل


رفقة عمر

واياكِ يا رفقة
الحمد لله ان البرنامج عجبك ولو محتاجة اي حاجة لا تترددي

My Hope$ said...

بيب بيب حودة
بيب بيب
مبروكككككككككككككككك
اية دة ماشاء الله عليك
ايوة كدا
طول عمرك كريم
ومش بتحب تبخل بالمعلومات لما قولت في مدونتي انك علمتني حاجات كتير ماكنتش غلط
يجي منك ياعم
وطبعا علم نافع محتفظتش بية لنفسك
وعايزين المزيد
بقي
مش تكسل
كتير
وظبطنا بقي
وتعالي نزلي ويندوز يلا استغلال علي ودنة
جزاك الله خير يا اخ محمود والله
وبعدين عاجبني اوي الشرح التفصيلي
بالصور اللي هو الجديد في النت يفهمة
شكرا بجد انا هاخد البرنامج علشان معنديش زي ما انت عارف
بس مقولتليش بكام البرنامج دة واللي تحتة
احسن يكونو غالين عليا
ببلاش طب اوك هاخد الاتنين بقي ابو بلاش بقي

سلامممممممممممممم

آلام وآمال said...

My Hope$

ده ايه الكلام الكبير ده بس
والله من ذوقك

وربنا يتقبل ويكون في ميزان حسناتنا
وان شاء الله فيه المزيد
وياريت لو محتاجة اي حاجة تقولي على طول
ولو تقدري حضرتك تجيبيلي الكيسة من اسكندرية وانا انزلك عليها ويندوز ماشي
بس طبعا مش ببلاش
البرامج دي بس اللي ببلاش
:D

ومنحرمش من دعواتك

عصفور المدينة said...

السلام عليكم
جزاك الله خيرا وبارك في جهدكم

في برنامج
FLASHGET

يوجد خاصية
ِِِِadd batch download

مثلا لو فرضنا مسار سور الفاتحة للشيخ الحصري

http://download.quran.islamway.com/quran3/144/001.rm

حتعمل
Add batch download
http://download.quran.islamway.com
/quran3/144/(*).rm

يبقى شيلنا
001
وحطينا بدالها
(*)
وتقول له
هات لي من
1
إلى
114

ونقول له عدد الخانات اللي مكان النجمة

3

ونعلق عليه يجيب المصحف كله وهكذا
ده ينفع جدا لو فيه سلسلة ملفات متتالية عايز تجيبها


وبرضه فيه إضافة في فايرفوكس
اسمها
flash got

http://flashgot.net/getit

ودي بنتمكنك تعمل داونلود من جوة فاير فوكس وفيه خواص لذيذة
وهي مش خاصة بفلاش جيت فقط

بل ممكن تختار انت بتستخدم إيه

خمسة فضفضة said...

السلام عليكم ورحمة الله وبركاته

شكرا يا محمود علي اهتمامك
انا باستخدم الفاير فوكس

آلام وآمال said...

عصفور المدينة
------------
مش عارف اشكر حضرتك ازاي على الاضافة الجميلة دي اللي استفدت بيها جدااا
لأني فعلا بيصادفني موضوع الملفات المتتالية ده كتير

بس معلش ياريت حضرتك توضحلنا اكتر حتة عدد الخانات دي عشان مش واصلالي اوي
وازاي اقوله هات لي من
1
الى
114

وان شاء الله سأضيف المعلومة للبوست
وبارك الله فيك

آلام وآمال said...

دكتورة خمسة فضفضة
----------------
لاشكر على واجب يافندم

الفايرفوكس متوافق تماما مع برنامج الانترنت داونلوود مانجر
والخاصية موجودة بالفعل فيه
لو حضرتك ضغطي كليك يمين على صفحة اليوتيوب المفروض هيظهرلك زي اللي في الصورة دي

http://img151.imageshack.us/img151/1009/00kf1.jpg

اذا حضرتك ملقيتيش كده يبقى الاصدار اللي عندك من برناج داونلوود مانجر مش فيها الخاصية دي
وهتضطري تحملي الاصدار الاخير اللي في التدوينة

وانا تحت امر حضرتك في اي استفسار

mariem_mero said...

السلام عليكم ورحمة الله وبركاته

حقيقي جزاك الله كل خير وجعله بميزان حسناتك
انا بستعمل الداونلود ماندجر بالفعل وحقيقي جميل جدا ومريح كنت سبق واستعملته ولكن لما نزلته قال زي ما حضرتك قلت ان مدته شهر بس فانا لما غيرت الويندوز ونزل البي ثري نزل معاه ومن غير تحديد لمدته وحقيقي جميل ومريح جدااااا ولما مثلا النور يفصل بعمله اعادة تشغيل تاني وبيكمل من حيث انتهى حقيقي البرنامج ده حلو اوي

ميرسي لحضرتك :)

Ahmed Al-Sabbagh said...

بسم الله

بداية موفقة

اتمنى لكم التوفيق من كل قلبى

المدونة عمل يفتخر به كل المدونين

تحياتى

أحمد الصباغ

Eman Eltaher said...

والله مدونتك دى مهمة و مواضيعها تفيد اى قارئ و مهتم بعالم الكمبيوتر
جزاك الله خيرا

إنـســـانـة said...

من الناس اللى بجد لما اقصدهم فى اى خدمة او استشارة الكترونية ما يتأخرش نهائى ده غير انه بيشرحالى بشكل مبسط ويخلينى استفيد وانفذ الموضوع كله بنفسى

ربنا يكرمك بجد يا محمود والف مبروك على المدونة الجديدة ومبروك لسلوى ويارب تبقى فاتحة خير عليكم

جزاكم الله خيرا بجد

saad alshater said...

فكرة جميلة اوي المدونة دي
وانا برشح الموقع ده للاستعانة به
لانه سايت ممتاز في البرامج
http://www.bramjnet.com
انا صراحة بستخدمة علي طوول
ربنا يوفقكوا

Soooo said...

شرح هايل وكام برنامج اهيل بجد
وبجد الف شكر

بس في حاجه اسمها تورنتات .. ايه الحوار ده
وايه البرامج بتاعته
وهل يفرق عن البرامج دي في حاجه ولا ايه العباره
نرجو التوضيح
والف تشكرات افانزيم تشكرات





سلامووووووووووووز

آلام وآمال said...

mariem_mero
--------------
وعليكم السلام ورحمة الله وبركاته
وربنا يجازيكي خير على مرورك وتشجيعك
وفعلا البرنامج ده جامد جدا



Ahmed Al-Sabbagh
------------------
خالو احمد
يادي الهنا يادي النور
منور والله يافندم
وربنا يكرمك على تشجعيك وتعليقك
يارب نكون عند حسن ظنكم بجد
نورتني يا خالو

آلام وآمال said...

Eman Eltaher
---------------
وجزاكِ يا ايمان ومنورة المدونة وان شاء الله تزورينا دايما


إنـســـانـة
-------------
انسانة بحالها عندنا
يا مرحبا يا مرحبا
ربنا يكرمك والله انتي تستاهلي كل خير يعني
واحنا في الخدمة في اي وقت يا فندم

آلام وآمال said...

saad alshater
--------------
جزاك الله خيرا يا استاذ سعد
فعلا موقع برامج نت موقع ممتاز والواحد بيفخر ان عندنا موقع عربي بالقوة دي
مفيش برنامج مش بلاقيه فيه بفضل الله
ربنا يكرمك يافندم على تشجيعك
وخلينا نشوفك على طول

آلام وآمال said...

Soooo
-------
اخيرا استاذنا شرفنا اللي عاملين البوست عشانه مخصوص ههههه
الحمد لله ان الشرح عجبك فعلا ويارب تكون استفدت من البرامج بجد

موضوع التورنت ده ممكن نفرد له تدوينة مخصوص
لكن عموما هو عبارة عن ملف بتشترك من خلاله مع مجموعة من الناس عبر الانترنت لتحميل فيلم او لعبة او حاجة حجمها كبير

ده باختصار شديد وان شاء الله ممكن نعمله تدوينة

برنامج فلاش جت يدعم الخاصية دي

Salwa said...

نورت المدونه وأضفت لها يا محمود

البرامج والشرح ولا أروع

معلش جت متأخره وإنت عارف

بس مش هينفع أرحب بك في مدونتك
صح

تحياتي
ومرة أخرى نورت المدونه

nonoymm said...

ربنا يكرمكوا يا رب ويخليكوا للي زيي يارب امين
مش عارفة اقول ايه غير جزاكم الله خير
خصوصا الموضوع بتاع قطع النت دة لحسن اتهريت منه
اول زيارة لمدونتكم وباذن الله متااااااااااابعة
بوركتم يارب

Bongo said...

مدونة جمييييييلة جداا و مفيدة كمااان

ربنا يوفقكوا

تحياتي

الغلبـان said...

مدونة جميلة
وأسلوب سلس وبسيط
فى برنامج لدونلود أسموا أنترنت داونلود مانجر
وبصراحة جامد جدا
وربنا يوفقكم

walaa said...

فعلا جزاك الله كل الخييير
كويس قوى اللى احنا نكمل بعضنا يعنى العارف يعرف اللى ميعرفش وجزاك الله خيير
تحياتى ولاء

آلام وآمال said...

Salwa
-------
ربنا يكرمك يا سلوى
حزاك الله خيرا على الفرصة دي
واتمنى فعلا ان يكون الشرح افاد الناس
واكون اضفت حاجة جديدة
شكرا جدااا على ذوقك


nonoymm
---------
ربنا يبارك فيكِ ويجازيكي خير
ونتمنى فعلا المتابعة
ولو حضرتك احتاجتي اي حاجة اؤمري على طوووول


Bongo
--------
الف شكر يا بونجو على ذوووقك وتعليقك الأجمل
ياريت تتابعنا على طول انشاء الله


الغلبـان
-----------
الف شكر على تشجيعك ونورت المدونة
ونتمنى تتابع ان شاء الله
والبرنامج فعلا موجود في التدوينة
بس حضرتك يظهر مكملتش البوست كله
:D


walaa
--------
ولاااااء
نورتي المدونة بجد
واتمنى انك تتابعينا ان شاء الله
ولو عندك اي اضافة ياريت تقوليها على طول
وجزاك الله خيرا على تعليقك يا ولاء